ИҚТИСОД
Шанбе 25 Май 2024 10:01
9983
Соли 2023 дар Ҷумҳурии Тоҷикистон 729 корхонаву коргоҳҳои нави саноатӣ бо 4846 ҷойҳои нави корӣ мавриди истифода қарор дода шуда, дар натиҷа ҳаҷми истеҳсоли маҳсулоти саноатӣ ба 46,8 млрд. сомонӣ баробар гардид ва суръати рушди он 12 фоизро ташкил дод.

Дар ин бора имрӯз - 13 феврал Завқӣ Завқизода, вазири рушди иқтисод ва савдои Ҷумҳурии Тоҷикистон зимни нишасти хабарӣ иттилоъ дод.

- Рушди соҳаи саноат аз ҳисоби 12,3 фоиз афзоиш ёфтани ҳаҷми истеҳсоли маҳсулоти саноати коркард, 11,7 фоиз саноати истихроҷ, 7 фоиз таъминоти неруи барқ, газ, буғ ва тозакунии ҳаво ва 20,9 фоиз таъминоти об, тозакунӣ, коркарди партовҳо ва дастрасии коркарди дуюмдараҷа таъмин гардидааст, - илова намуд Завқизода.

Ҳамзамон гуфта шуд, ки дар соли 2023 дар соҳаи саноат ҷиҳати ноилшавӣ ба ҳадафи чоруми миллӣ - саноатикунонии босуръати кишвар, зиёд кардани ҳаҷми истеҳсоли маҳсулот ва таъмини талаботи бозор бо маҳсулоти рақобатпазири ватанӣ, ба кор андохтани иқтидорҳои нав, истифодаи пурраи иқтидорҳои истеҳсолӣ ва содиротӣ, инчунин таъсиси ҷойҳои нави корӣ як қатор тадбирҳо амалӣ гардиданд.

Ёдовар мешавем, ки сар аз соли 2022 дар Тоҷикистон бо фармони вижаи Президенти кишвар муҳтарам Эмомалӣ Раҳмон барои панҷ сол солҳои 2022-2026 Солҳои рушди саноат эълон гардидаанд. Ҳамзамон барои рушди ин соҳа стратегия ва барномаҳои алоҳида амал мекунад.

Наҷиба МУРОДБЕКОВА, "ҶТ"

Эзоҳи худро нависед



Рамзҳо дар расм