Соли 2023 дар Тоҷикистон 33 ҳазор соҳибкор сабти ном шуда, дар ин росто 25,1 ҳазор субектҳои соҳибкорӣ фаъолияти худро қатъ кардаанд.

Дар ин бораи имрӯз - 13-уми феврал Султон Раҳимзода, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон хабар дод.

Бино ба иттилои Раҳимзода субектҳои соҳибкорие, ки фаъолияти хешро қатъ кардаанд бештарашон ба навъи дигари соҳибкорӣ гузаштаанд “ва ин маънои муфлис шудану аз соҳибкорӣ даст кашидани онҳоро надорад”.

Инчунин, раиси Кумитаи давлатии сармоягузорӣ ва идораи амволи давлатӣ қайд намуд, ки дар давраи ҳисоботӣ барои рушди соҳибкории ватанӣ аз ҷониби ташкилотҳои қарзии молиявӣ ба соҳибкорон беш аз 10 млрд. сомонӣ қарз пешниҳод шудааст.

Яҳё МАҲМАДНАБИЕВ, “ҶТ”