Давоми шашмоҳаи аввали соли ҷорӣ дар кишвар 489 корхонаи нави саноатӣ ва 2400 ҷойи нави корӣ таъсис дода шудааст.

Дар ин бора имрӯз - 7 август Шералӣ Кабир, вазири саноат ва технологияҳои нави Ҷумҳурии Тоҷикистон зимни нишасти хабарӣ иттилоъ дод.

Ба гуфтаи вазир дар ВМКБ 6 корхона бо 40 ҷойи корӣ, дар вилояти Суғд 162 корхона бо 1072 ҷойи корӣ, дар вилояти Хатлон 83 корхона бо 455 ҷойи корӣ, дар ноҳияҳои тобеи ҷумҳурӣ 97 корхона, бо 265 ҷойи корӣ ва дар шаҳри Душанбе бошад 141 корхона, бо 568 ҷойи корӣ ба истифода дода шудаанд.

Инчунин, номбурда зикр намуд, ки дар ин давра ҷиҳати таъсиси истеҳсолоти нав, воридоти таҷҳизоти технологӣ ва васеъгардонии фондҳои истеҳсолӣ 3 млрд 190,7 млн сомонӣ маблағҳои дохилии корхонаҳо ва сармоягузорони хориҷӣ равона гардидааст, ки нисбати ба ҳамин давраи соли сипаришуда 833,4 млн сомонӣ зиёд мебошад.

Фараҳноз САФАРОВА, "ҶТ"