Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон баргузор гардид.

Дар ҷаласаи мазкур оид ба се созишнома ва 1 қонун қарорҳои дахлдор қабул гардид.

Созишнома оид ба пешниҳоди қарзи молиявӣ аз воситаҳои Фонди Авруосиёии Муътадилгардонӣ ва Рушд барои дастгирии буҷети давлатӣ дар шароити пандемияи COVID-19 байни Ҷумҳурии Тоҷикистон ва Бонки Авруосиёии Рушд яке аз он созишномаҳое буд, ки дар ин ҷаласа мавриди баррасӣ қарор гирифт.

Вобаста ба созишномаи мазкур сараввал вазири молияи Ҷумҳурии Тоҷикистон Қаҳҳорзода Файзиддин суханронӣ намуда, иброз дошт, ки ин созишномаи бо тартиби муқаррарнамудаи қонунгузории кишвар 21-уми сентяри соли ҷорӣ ба имзо расонида шуда, бо мақсади коҳиш додани оқибатҳои манфии пандемияи COVID-19 ба соҳаҳои иҷтимоӣ-иқтисодии кишвар равона гардидааст.

Инчунин ӯ дар идомаи суханронӣ афзуд: “Ҳаҷми маблағи умумии Созишнома 50 миллион доллари амрикоиро ташкил дода, аз ҳисоби маблағҳои фонди Авруосиёии Муътадилгардонӣ ва Рушд дар шакли қарзи имтиёзнок пешниҳод гардидааст. Тибқи шартҳои созишнома, маблағи қарзӣ ба муҳлати 20 сол, бо муҳлати имтиёзӣ 10 сол, бо меъёри хизматрасонӣ 0,25% барои соли аввал ва баъдан барои солҳои минбаъда 1% ҷалб карда мешавад”.

Ҳамчунин вазири молия зимни муаррифии созишномаи мазкур иброз доштанд: - Маблағи ҷалбгардида барои пушонидани касри буҷетӣ давлатӣ, бахусус барои маблағгузории хароҷоти буҷет, ки дар Қонуни Ҷумҳурии Тоҷикистон “Дар бораи буҷети давлатии Ҷумҳурии Тоҷикистон барои соли 2020” пешбинӣ шудааст, аз ҷумла бо бартарият барои маблағгузории соҳаҳои иҷтимоӣ, иҷрои уҳдадориҳои иҷтимоии давлат, дигар пардохтҳои иҷтимоӣ, зиёд намудани ҳаҷми маблағгузорӣ ба соҳаҳои тандурустӣ, ва ба маблағгузориҳои дигари иқтисоди миллӣ равона карда мешавад.

Баъд аз суханронии вазири молияи кишвар узви Кумитаи Маҷлиси намояндагон оид ба иқтисод ва молия Назирӣ Гулбаҳор баромад намуда, гуфт: “Созишномаи мазкур саҳми молиявӣ дошта, дар шароити тағйирёбии иқтидори иқтисодии ҷаҳон, ки онро бемории сироятии COVID-19 ба вуҷуд овард, барои ҳалли мушкилоти молиявии давлат, таъмини музди меҳнат ва уҳдадориҳои иҷтимоӣ тавассути дастгирии буҷети давлатӣ равона гардида, барои рушди иқтисодӣ-иҷтимоии кишвар мусоидат менамояд. Маблағҳои мазкур пурра ба қисми даромади буҷети давлатии Ҷумҳурии Тоҷикистон ворид мегарданд.”