Имрӯз дар шаҳри Душанбе боз як ширкати нави таксиронӣ - “Эко таксӣ” ба фаъолият оғоз намуд.

Дар ин бора шабакаи телеграмии шаҳрдори Душанбе хабар дод.

Ба иттилои манбаъ ширкат бо дастури бевоситаи раиси шаҳри Душанбе муҳтарам Рустам Эмомалӣ кори худро шуруъ карда, мақсад аз таъсиси боз як ширкати дигар гузариши пурра ба иқтисоди сабз унвон мешавад.

Ширкат бо 400 электромобил кори худро шуруъ кард, ки дар рӯнамоии он Саидзода Фирдавс, муовини Раиси шаҳри Душанбе, роҳбарияти Ҷамъияти саҳомии пӯшидаи “Эко таксӣ” ва Раёсати бозрасии давлатии автомобилӣ иштирок доштанд.

Бояд гуфт, ки тибқи қарори дахлдори раиси шаҳри Душанбе ҷамъиятҳое, ки ба хизматрасонии нақлиётии мусофиркашонӣ (таксӣ) дар шаҳри Душанбе машғул ҳастанд, муваззаф гардидаанд, ки то 1 сентябри соли 2025 пурра ба низоми нақлиёти барқӣ гузаранд.

Ёдовар мешавем, ки ба ҷуз аз ширкати “Эко таксӣ” дар шаҳри Душанбе 12 ширкати кироякаши таксӣ фаъолият менамояд ва айни ҳол 56, 3 фоизи таксиҳоро электромобил ташкил медиҳанд.