Дар нимсолаи аввали соли 2024 ҳаҷми маҷмуи маҳсулоти дохилӣ 61,7 млрд. сомонӣ ва суръати рушди воқеии он 8,2 фоизро ташкил дод.

Ин нуктаро Завқизода Завқӣ, вазири рушди иқтисод ва савдои Ҷумҳурии Тоҷикистон 6 август зимни нишасти хабарӣ баён намуд.
Номбурда қайд намуд, ки дар ин давра дар ҳудуди кишвар 251 корхонаи нави саноатӣ бо 1714 ҷойҳои нави корӣ мавриди истифода қарор дода шуданд, ки дар натиҷа ҳаҷми истеҳсоли маҳсулоти саноатӣ 22,6 млрд. сомонӣ ва суръати рушди воқеии он 11,5 фоизро ташкил дод.

Рушди соҳаи саноат аз ҳисоби 21,4 фоиз афзудани саноати истихроҷ, 11 фоиз саноати коркард ва 1,6 баробар зиёд шудани соҳаи таъминоти об ва коркарди партовҳо таъмин гардидааст.

Дар ин давра афзоиши ҳаҷми гардиши савдои хориҷӣ, содирот ва воридот низ ба қайд гирифта шудааст. Сохтори содиротро асосан металҳои қиматбаҳо (30,1%), нахи пахта (12%), маъданҳо (17,7%), алюминийи аввалия (9,7%), либосҳои гуногун (2,6%), маҳсулоти кишоварзӣ (2,4%) , неруи барқ (3,5%) ва дигар маҳсулот ташкил намудааст.

Гуфта шуд, ки рушди иқтисоди миллӣ дар нимсолаи аввали соли ҷорӣ асосан аз ҳисоби зиёд шудани ҳаҷми истеҳсоли маҳсулоти саноатӣ, кишоварзӣ, хизматрасонии пулакӣ, гардиши савдо, боркашонӣ ва мусофиркашонӣ таъмин гардидааст.