Бо назардошти тамоюлҳои мусбии рушди соҳаҳои иқтисоди миллӣ ҳаҷми умумии даромади буҷети давлатӣ дар нимсолаи якуми соли 2026 аз ҳисоби ҳамаи сарчашмаҳои даромад дар сатҳи 114,3 фоиз иҷро гардида, ба буҷет 36,4 млрд сомонӣ маблағ ворид гардид.

Дар ин бора Қаҳҳорзода Файзиддин Саттор, вазири молияи Ҷумҳурии Тоҷикистон 22 июл зимни нишасти матбуотӣ иттилоъ дода, дар идома илова намуд, ки иҷрои нақшаи даромади дохилӣ аз ҷониби Кумитаи андоз дар сатҳи 123,3 фоиз таъмин гардида, ба буҷет 17,4 млрд сомонӣ ворид гардид.

Ҳамчунин, зикр гардид, ки дар давраи ҳисоботӣ воридоти маблағҳо аз ҳисоби фаъолияти Хадамоти гумрук дар сатҳи 107,6 фоизи нақша таъмин карда шуда, ба буҷет 7,8 млрд сомонӣ ворид шуд.

Ба гуфти вазири молия аз ҳисоби лоиҳаҳои сармоягузории давлатӣ, ки дар қисми даромад ва хароҷоти буҷети давлатӣ ба инобат гирифта мешавад, дар нимсолаи якум 5,5 млрд сомонӣ аз худ карда шуд. Аз маблағи зикршуда 4,0 млрд сомонӣ маблағҳои грантӣ ва 1,5 млрд сомонӣ маблағҳои қарзӣ мебошад.

О. ҶУРАХОН, “ҶТ”