Олимони тоҷик, махсусан муҳаққиқони Академияи миллии илмҳои Тоҷикистон аз ин пас ба татбиқи илм дар истеҳсолот бештар кӯшиш хоҳанд кард.

Дар ин бора имрӯз 8 феврал Қобилҷон Хушвахтзода, президенти Академияи миллии илмҳои Тоҷикистон хабар дод.

Ӯ гуфт мо дар ин самт корро ҷиддитар мекунем ва дар ояндаи наздик мекӯшем тамоми тадқиқотҳои илмӣ ба истеҳсолот пайванд шавад.

- Бо мақсади муаррифии дастовардҳои илмии олимон ва тадбиқи натиҷаи коркардҳои илмию техникӣ дар истеҳсолот ва қабули фармоишоти корхонаҳои истеҳсолӣ олимони Академия милли илмҳо дар соли сипаришуда беш аз 60 корхонаи истеҳсолии ватаниро дидан намуданд.

Ҳамчунин, Қобилҷон Хушвахтзода гуфт соли 2023 аз ҷониби муассисаҳои илмии Академия 395 муҳаққиқ ва олиму коршиносони хориҷӣ барои иштирок дар конфренсияҳои илмӣ, симпозиумҳо, семинарҳо, форумҳо, хондани лексияҳо ва ҳамчунин гузаронидани тадқиқоти муштараки илмӣ ба Ҷумҳурии Тоҷикистон даъват гардиданд. Дар ин баробар 447 олиму коршиносони Академия бо ин мақсадҳо ба хориҷи кишвар сафарбар карда шуданд.

Ҷонибек ДАВРОНОВ, “ҶТ”