Корхонаи воҳиди давлатии бонки амонатгузории Ҷумҳурии Тоҷикистон "Амонатбонк " дар соли 2025 ба андозаи 2,5 млрд сомонӣ маблағҳои қарзӣ ба мизоҷон пешниҳод намудааст. Дар ин хусус, имрӯз - 10 феврал Алиҷон Салимзода, раиси Раёсати КВД БА ҶТ "Амонатбонк " иттилоъ дод.

Ӯ зикр намуд, ки ин маблағ аз ҳисоби захираҳои дохилию хориҷии бонк буда, ба зиёда аз 60 ҳазор мизоҷ пешниҳод шуда, қарзҳои додашуда ба соҳаҳои саноат 5,3 фоиз, кишоварзӣ 10,9 фоиз, истеъмолӣ 49,9 фоиз, сохтмон 4,7 фоиз, тиҷорат 9,5 фоиз, қарзҳои байнибонкӣ 17,3 фоиз ва ба дигар соҳаҳо 2,4 фоиз рост меояд.

Ҳамчунин, гуфта шуд, ки сандуқи қарзии Бонк зиёда аз 3,7 млрд сомонӣ ва шумораи қарзгирон аз рӯйи бақия зиёда аз 84 ҳазор нафарро ташкил медиҳад.

Дар идома иброз гардид, ки Бонк дар маҷмуъ бо 8 505 корхонаву ташкилотҳои буҷетӣ ва ғайрибуҷетӣ тавассути кортҳои пардохтии бонкӣ ҳамкориро ба роҳ мондааст, ки нисбат ба соли 2024 121 адад зиёд мебошад.

Инчунин, таъкид шуд, ки шумораи дорандагони кортҳои пардохтии бонкӣ наздик ба 2 млн нафар расидааст.

Гулафшон КАРИМОВА, “ҶТ”