Аз моҳи августи соли 2025 барои воридоти мошинҳои барқӣ ба Ҷумҳурии Тоҷикистон 50 фоиз боҷи гумрукӣ ва 100 фоиз маблағи нобудсозӣ (утилизатсия) ҷорӣ гардидааст. Дар ин бора имрӯз - 12 феврал Каримзода Хуршед, сардори Хадамоти гумруки назди Ҳукумати Ҷумҳурии Тоҷикистон зимни нишасти матбуотӣ ба хабарнигорон иттилоъ дод.

Ба гуфтаи ӯ, то соли 2025 воридоти электромобилҳо ба кишвар аз пардохти боҷи гумрукӣ пурра озод буд ва танҳо баъзе пардохтҳои техникӣ татбиқ мегардиданд. Аммо бо назардошти афзоиши босуръати шумораи ин навъи воситаҳои нақлиёт ва зарурати танзими бозор аз моҳи августи соли гузашта сиёсати гумрукӣ дар ин самт таҷдиди назар карда шуд.

Каримзода Хуршед таъкид намуд, ки тибқи тартиби нав барои воридоти ҳар як мошини барқӣ 100 фоиз маблағи нобудсозӣ, ё ба истилоҳ утилизатсия, инчунин, 50 фоиз боҷи гумрукӣ ситонида мешавад. Ба гуфтаи ӯ, ин иқдом пеш аз ҳама ба танзими воридоти нақлиёти барқӣ, таъмини бехатарии экологӣ ва баланд бардоштани масъулияти воридкунандагон равона гардидааст.

Гуфта шуд, ки аз соли 2021 сар карда, воридоти электромобилҳо ба Тоҷикистон ба марҳилаи авҷи худ расидааст. Тибқи маълумоти расмӣ, ҳамасола то 17 ҳазор мошини барқӣ ба кишвар ворид мегардад. Қисми зиёди ин нақлиёт дар соҳаи кирокашӣ ва хизматрасонии мусофирон истифода мешавад.

Масъулини Хадамоти гумрук бар он назаранд, ки ҷорӣ намудани боҷи гумрукӣ ва маблағи утилизатсия ба танзими оқилонаи бозори нақлиёти барқӣ мусоидат намуда, ҳамзамон манфиатҳои иқтисодии давлат ва талаботи экологиро ба эътибор мегирад.

Яҳё МАҲМАДНАБИЕВ, “ҶТ”