Дар соли 2021 ба Ҷумҳурии Тоҷикистон беш аз 700 млн. доллари амрикоӣ сармояи хориҷӣ ворид гардидааст, ки аз он дар доираи 340 млн. долларро сармояи мустақим ва 370 млн. долларро дигар намуди сармояҳо ташкил медиҳанд.

Ин нуктаро рӯз 11-уми феврал Саъдӣ Қодирзода, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон зимни нишасти хабарӣ иттилоъ дод.

“Воридоти сармояи хориҷӣ нисбат ба соли 2020 тамоюли афзоишдошта, дар маҷмӯъ зиёдшавӣ ба маблағи беш аз 280 млн. доллар, аз ҷумла сармояи мустақим 179,7 млн. ва дигар намуди сармояҳо бошад, 110,6 млн. барорбар аст,-гуфт раиси Кумита.

Ҳамзамон ӯ иброз намуд, ки ин сармояҳои мустақим асосан аз Чин, Туркия, Швейтсария, Фаронса, Кипр, Британияи Кабир ва дигар кишварҳо ворид гардидаанд. Ин сармоҳо ба соҳаҳои истихроҷи маъдан, саноати коркард, сохтмон ва дигар соҳаҳо равона карда шудаанд.