“Ҳифзи иҷтимоии аҳолӣ - яке аз афзалият-ҳои сиёсати иҷтимоии давлат ба ҳисоб рафта, мақсади асосии он мусоидат ба рушди сармояи инсонӣ мебошад”.
 Эмомалӣ Раҳмон

Дар Паёми ахири Президенти Ҷумҳурии Тоҷикистон ба Маҷлиси Олии икшвар пешниҳод гардида буд, ки аз моҳи сентябри соли 2020 маоши кормандони хизматчиёни давлатӣ, муассисаву ташкилотҳои буҷетӣ, андозаи нафақа ва стипендия зиёд карда шавад. Инак ин тадбир мавриди амал қарор гирифта, имкон фароҳам меорад, то вазъи иҷтимоии шаҳрвандони кишвар боз беҳтар гардад.

Ҳамагон медонем, ки дар замони соҳибистиқлолӣ бо ташаббуси бевоситаи Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон борҳо музди меҳнати кормандони соҳаи буҷетӣ баланд гардид. Тӯли ин солҳо сатҳи камбизоатӣ ба андозаи 27,5% паст гардида, даромади пулии аҳолӣ беш аз ду баробар ва музди меҳнати миёнаи як корманд 2,4 баробар афзоиш пайдо кард.

Тибқи маълумоти омори расмӣ музди миёнаи меҳнат ба ҳолати 1 июни соли 2020, 1368,9 сомониро ташкил дода, нисбат ба аввали соли равон 2,5 фоиз зиёд шудааст. То 1 июни соли 2020 дар ҷумҳурӣ 86 663 адад корхона, новобаста аз шакли моликият арзи вуҷуд дошта, аз ин шумора 18 295 адад фаъол буда, 17 060 корхона бо шартнома ва созишнома фаро гирифта шудаанд, ки 93,2%-ро ташкил медиҳад.

Беҳтар намудани сатҳу сифати хизматрасонии иҷтимоӣ ба аҳолӣ, таъмини саривақтии нафақаву кӯмакпулиҳои иҷтимоӣ, мунтазам баланд бардоштани андозаи онҳо ва ба ин васила таъмини рушди босуботи соҳа пайваста зери таваҷҷуҳи махсуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Ҳукумати Ҷумҳурии Тоҷикистон қарор дорад ва дар ин самт бо дарназардошти рушди иқтисодиёти мамлакат пайваста тадбирҳои мушаххас роҳандозӣ гардида истодаанд.

Дар Паёми ахирини Сарвари давлат аз ҷумла омадааст, ки бо мақсади дастгирии иҷтимоии табақаҳои осебпазири ҷомеа нафақаи шаҳрвандони маъюби то 18 - сола, инчунин дигар гурӯҳҳои маъюбон, ки кор намекунанд ва ба нигоҳубин эҳтиёҷ доранд, аз 1 сентябри соли ҷорӣ 50 фоиз, ҳамчунин ҳадди ақал ва ҳадди ниҳоии нафақа аз рӯи синну сол ва нафақаи заминавӣ, инчунин нафақаҳои меҳнатии шаҳрвандон 15 фоиз зиёд карда шавад. Ин тадбир имкон медиҳад, ки вазъи иҷтимоии қариб 30 ҳазор нафар нафақагир беҳтар гардад.
Ҳоло дар мамлакат 700 ҳазор нафар нафақахӯр, аз ҷумла 148 ҳазор маъюб, 5277 нафар ятими кулл ва 74 ҳазор ятим зери сарпарастии давлат қарор доранд.

Мавриди зикр аст, ки дар давоми 10 соли охир ҳаҷми маблағгузорӣ ба муассисаҳои пиронсолон ва маъюбон 3,2 баробар афзоиш ёфтааст. Танҳо соли 2019 ҳаҷми кумакпулиҳо аз ҳисоби буҷети давлат барои шаҳрвандони имконияташон маҳдуд беш аз 102 миллион сомониро ташкил медиҳад.

Ҳамзамон, музди меҳнати хизматчиёни давлатӣ, муассисаҳои маориф, илм, фарҳанг, варзиш, тандурустӣ, муассисаҳои соҳаи ҳифзи иҷтимоӣ ва дигар ташкилоту муассисаҳои буҷетӣ, инчунин стипендияи донишҷӯён ва дигар намудҳои стипендия 15 фоиз ва музди меҳнати кормандони мақомоти ҳифзи ҳуқуқ ва хизматчиёни ҳарбӣ 10 фоиз зиёд карда шуд.

Воқеан, Президенти кишвар қариб дар ҳама Паёмҳои худ ба Маҷлиси Олии мамлакат аз беҳтар намудани сатҳи зиндагии мардум ва зиёд гардидани андозаи маошу нафақа ва стипендия мужда медиҳад, ки аз ҷониби сокинони мамлакат ҳамовозии гарму ҷӯшон пайдо мекунад. Аз ҷумла, кормандони соҳаи маориф аз чунин иқдоми Президенти мамлакат бештар аз дигар қишрҳои ҷомеа изҳори сипосу қаноатмандӣ менамоянд.

“Боиси хушнудист, ки бо ташаббуси беназири Президенти Ҷумҳурии Тоҷикистон маоши кормандони ташкилоту массисаҳое, ки аз ҳисоби буҷети давлат маблағгузорӣ мешаванд, аз ҷумла соҳаи маориф низ 15 фоиз зиёд гардид. Дастгирии қишри осебпазири ҷомеа ҳамеша дар маркази таваҷҷуҳи роҳбарияти олии мамлакат қарор дошта, сол то сол ин дастгириву ғамхориҳо бештару беҳтар мегардад. Дар лаҳзаҳое, ки кишварҳои ҷаҳон ба буҳрони иқтисодӣ рӯ ба рӯ гардидаанд, иқдоми навбатии Президенти ҷумҳурӣ айни муддаост”, - гуфт ҳангоми суҳбат омӯзгори МТМУ №35–и пойтахт М. Розиқова.

Воқеан, боиси сарфарозист, ки новобаста аз буҳрони молиявӣ ва равоние, ки аксари ҷаҳонро фаро гирифтааст, Ҷумҳурии Тоҷикистон ҳамчун давлати соҳибистиқлолу демократӣ тавонистааст, ки алайҳи тамоми мушкилоти ҷойдошта, дастболо ва пирӯз гардад. Иқдоми навбатии роҳбарияти давлату ҳукумати мамлакат бори дигар шаҳрвандони касбу кори гуногунро ба он водор месозад, ки нисбат ба кори худ содиқ бошанду барои пешрафти мамлакат пайваста саҳми худро гузоранд.

Омӯзгор Идимо Имматшоева қаноатмандии худро аз иқдоми навбатии Президенти мамлакат чунин иброз намуд: “Миннатдории худро ба Сарвари давлат муҳтарам Эмомалӣ Раҳмон мерасонам, ки меҳнатҳои шабонарӯзии моро ба инобат гирифта, тавонистанд, ки то 15 фоиз маоши мо, кормандони соҳаи маорифро баланд бардоранд. Мо аз чунин дастгириҳо рӯҳу илҳоми нав гирифта, кӯшиш ба харҷ медиҳем, ки дар баланд бардоштани сатҳу сифати дониши шогирдон, дар рӯҳияи ватандӯстӣ, худшиносиву ифтихори миллӣ тарбия намудани онҳо саҳми арзанда гузорем”.

Бори аввал нест, ки бо истифода аз имконоти мавҷуда дар заминаи рушди иқтисоди миллӣ маоши кормандони соҳаи буҷетӣ баланд бардошта мешавад. Бояд гуфт, ки дар солҳои соҳибистиқлолӣ чандин фармонҳои Президенти Ҷумҳурии Тоҷикистон дар бораи баланд бардоштани маоши кормандони соҳаи буҷетӣ, нафақа ва стипендия ба тасвиб расидааст.

Чунин иқдомоти наҷиб ва дастгириҳои пайвастаи Президенти кишвар бо мақсади боз ҳам беҳтар намудани сатҳи зиндагӣ ва коҳиш додани сатҳи камбизоатии аҳолӣ роҳандозӣ мегардад. Аз ин рӯ, ҳар як сокини мамлакатро мебояд, ки барои рушду нумуи ҳарчи бештари Тоҷикистон ва боз ҳам ободу зебо гардонидани Ватани азизи худ ҳиссагузор бошад.