Аз 12 то 16 августи соли ҷорӣ дар маҷмааи истироҳатии “Ёс”-и шаҳри Ваҳдат барои ҷавонон мактаби тобистонаи зиддикоррупсионӣ ташкил карда мешавад.

Дар ин хусус сомонаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон иттилоъ медиҳад.

Бино ба иттилои манбаъ мактаби мазкурро дафтари барномаҳои Созмони Амният ва Ҳамкории Аврупо дар Душанбе дар ҳамбастагӣ бо Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва Иттифоқи ташкилотҳои ҷамъиятии зидди коррупсия ва шаффофият баргузор менамоянд.

Гуфта мешавад, ки дар чорабинӣ мутахассисон аз Агентии назорати давлатии молиявӣ ва мубориза бо коррупсия, Дафтари барномаҳои САҲА дар Душанбе, намояндагони ҷомеаи шаҳрвандӣ ва мутахассисони сатҳи байналмилалӣ ширкат варзида, вобаста ба масъалаи коррупсия лексияҳо ва машғулиятҳои интерактивӣ барпо менамоянд.

Таъкид мегардад, ки ҳадаф аз ташкили чорабинии мазкур баланд бардоштани маърифати ҳуқуқии зиддикоррупсионии ҷавонон, ҷалби ҷавонон ба масоили муқовимат ба коррупсия ва табодули таҷрибаҳои беҳтарин дар самти мубориза ба коррупсия мебошад.

Зимнан ширкат дар он ройгон буда, рафту омад, будубош ва хӯроки иштирокчиён аз ҷониби ташкилкунанда пурра пардохт карда мешавад.

Хоҳишмандон метавонанд барои иштирок ва ирсоли дархостҳо ба суроғаи forms.gle-и Агентии назорати давлатии молиявӣ ва мубориза бо коррупсия муроҷиат намоянд.

Гулафшон КАРИМОВА, “ҶТ”