Дар соли 2022 зиёда аз 2,5 миллиард сомонӣ аз буҷаи давлат барои сохтмони неругоҳи барқии обии Роғун ҷудо карда мешавад.

Дар ин бора 2 феврал Файзиддин Қаҳҳорзода, вазири молияи Ҷумҳурии Тоҷикистон зимни нишасти ин ниҳод иттилоъ дод.

“Дар соли 2022 мо барои сохтмони Роғун дар доираи имкониятҳои буҷети мамлакат 2,5 миллиард сомонӣ ҷудо кардаем ва вобаста ба имкониятҳо кӯшиш ба харҷ медиҳем, ки маблағгузории саривақтии ин иншоот анҷом дода шавад”,- гуфт Қаҳҳорзода.

Дар муқоиса бо соли 2021 ин маблағгузорӣ 10 фоиз бештар аст. Чун соли 2021 барои бунёди неругоҳи НБО “Роғун” 2, 1 миллиард сомонӣ ҷудо шуда буд.
Ба гуфти вазир, айни замон назари коршиносони ҷаҳонӣ ба сохтмони Роғун тағйир ёфтааст. Чун ҷомеаи ҷаҳонӣ аз тағйирёбии иқлим дар ташвиш аст ва тавлиди неруи барқ бидуни ифлоссозии иқлимро бояд дастгирӣ намуд.

- Вобаста ба тағйирёбии иқлим ва талаботи ҷомеаи ҷаҳонӣ ба кам кардани гази карбон ба атмосфера имрӯз бисёр кишварҳо аз истифодабарии манбаъҳои истеҳсоли неруи барқ, яъне нафт, газ ва ангишт худдорӣ карда истодаанд. Ман фикр мекунам, ки имрӯз нигоҳи ҷомеаи ҷаҳонӣ ба иншоот комилан дигар аст,-илова кард вазир.