Дар нишасти матбуотии Бонки миллии Ҷумҳурии Тоҷикистон, ки 22 июли соли ҷорӣ бо иштироки раёсати бонк, масъулини шуъбаву раёсатҳои дахлдори он ва доираи васеи рӯзноманигорон баргузор гардид, фаъолияти он дар нимсолаи аввали соли ҷорӣ натиҷагирӣ карда шуд. Раиси Бонки миллӣ Холиқзода Ҳоким зикр намуд, ки дар ин давра рушди иқтисодиёт муътадил буда, ММД 40,0 млрд. сомонӣ ва афзоиши воқеии он 8,7 %-ро ташкил дод. Дар давраи ҳисоботӣ аз ҷониби Бонки миллии кишвар дар ҳаҷми 153 млрд. сомонӣ амонатҳои шабонарӯзии ташкилотҳои қарзии молиявӣ ҷалб гардид.

Гуфта шуд, ки дар нимсолаи аввали соли 2021 дар ҷумҳурӣ дар маҷмуъ 63 адад ташкилоти қарзии молиявӣ ба қайд гирифта шуд, ки аз инҳо 14 адад бонки анъанавӣ, 1 адад бонки исломӣ, 17 адад ташкилоти амонатии қарзии хурд, 4 адад ташкилоти қарзии хурд ва 27 адад фонди қарзии хурд мебошанд. Фаъолияти молиявии ташкилотҳои қарзии молиявӣ беҳтар ва бақияи пасандозҳо низ нисбати ҳамин давраи соли пешин зиёдтар арзёбӣ гардид. Ҳаҷми умумии қарзҳои додашуда дар ин давра беш аз 6,5 млрд. сомониро ташкил дод, ки нисбати соли гузашта 64,2 % зиёдтар аст. Аз ҳаҷми умумии қарзҳои додашуда ба соҳаи истеъмолот – 32,1 %, кишоварзӣ – 17,8 %, савдои хориҷӣ – 16,4 %, нақлиёт – 1,2 %, хизматрасонӣ – 13,0 %, саноат – 9,4 %, сохтмон – 3,5 %, хӯроки ҷамъиятӣ - 0,7 % ва дигар соҳаҳо – 5,9 % рост меояд.

То охири моҳи июни соли ҷорӣ аз ҷониби бонкҳо ба муштариён бо фоизи нисбатан паст ба маблағи 682,0 млн. сомонӣ (ба 301,0 ҳазор нафар қарзгир) дода шудааст.

Ҳаҷми умумии қарзҳои барои рушди соҳибкорӣ додашуда беш аз 4,4 млрд. сомониро ташкил додааст, ки нисбат ба ҳамин давраи соли гузашта 55,2 % зиёд мебошад.