Корхонаи воҳиди давлатии “Тоҷиксуғурта” дар соли 2023 бо 547 ҳазору 625 нафар шахсони воқеиву ҳуқуқӣ шартномаи суғуртавӣ ба имзо расонидааст. Ба корхона аз ин ҳисоб 39 миллиону 459,2 ҳазор сомонӣ ворид гардида, нақшаи солона 118,5% таъмин карда шудааст.

Ин нукта аз ҷониби Мақсуд Шуҳратзода, директори Корхонаи воҳиди давлатии “Тоҷиксуғурта” имрӯз - 5 феврал зимни нишасти матбуотии ниҳоди мазкур гуфта шуд.

- Аз шумораи умумии шартномаҳои басташуда 19 ҳазору 555 адад бо маблағи 3 миллиону 444,2 ҳазор сомонӣ, ё 8,5% маблағи воридгардида ба шакли суғуртаи ҳатмӣ ва 528 ҳазору 70 адад ба маблағи 36 миллиону 15 ҳазор сомонӣ ё 91,5% дар шакли суғуртаи ихтиёрӣ рост меояд, - афзуд ӯ.

Факти бисёр шудани шумораи шахсони суғурташуда дар ҳолест, ки пайваста дар шабакаҳои иҷтимоӣ ва расонаҳо фаъолияти КВД “Тоҷиксуғурта” танқид мешавад ва мардум аз он изҳори нигаронӣ мекунанд, ки дар мавридҳои зарурӣ ин корхона ба онҳо кумак наменамояд.