Тайи чанд ҳафтаи охир дар ҷумҳурӣ болоравии нархи гӯшти гов ва гӯсфанд ба назар мерасад ва ин мардумро то ҷое нигарон кардаасту онҳо мехоҳанд сабаби ин гароншавиро дарёбанд.

Сабаби асосии болоравии нархи гӯштро имрӯз зимни нишасти хабарии Хадамоти зиддиинҳисории назди Ҳукумати Ҷумҳурии Тоҷикистон Сафаралӣ Қурбонзода, муовини якуми сардори Хадамот чунин шарҳ дод.

- Дар асоси маълумотҳои бозорҳои чорво дар ҷумҳурӣ нархи 1 кг чорвои зинда аз 40 то 48 сомонӣ ба фурӯш гузошта шудааст. Ҳол он, ки як моҳ қабл ин нишондиҳанда аз 37 то 39 сомонӣ буд. Аз 1 кг гӯшти чорвои зинда то 55 фоиз гӯшт гирифтан мумкин аст, - гуфт Сафаралӣ Қурбонзода.

Мувофиқи иттилои номбурда ин нишондиҳандаро масъулини бозор дар кам шудани саршумори чорво маънидод карданд, аммо дар ҷумҳурӣ тибқи маълумотҳои оморӣ дар нимсолаи аввали соли 2024 88,3 ҳазор тонна гӯшти чорвои калон ва майда дар вазни зинда истеҳсол гардидааст, ки нисбат ба ҳамин давраи соли гузашта 11,3 ҳазор тонна ё 14,7 фоиз афзоиш ёфта, айни замон аз хориҷи кишвар воридоти гӯшти чорво ба назар намерасад.

Дар идомаи суханронӣ Сафаралӣ Қурбонзода гуфт, нархи ин навъи маҳсулот дар ҷумҳуриҳои ҳамсоя аз қабили Ӯзбекистон ва Қазоқистон низ тайи чанд вақти охир баланд шуда, дар Ӯзбекистон арзиши он муодили 80 ва дар Қазоқистон ба 70 сомони тоҷикӣ баробар гаштааст.