Тибқи маълумоти пешниҳоднамудаи комиссияҳои доимии танзими анъана ва ҷашну маросими мақомоти иҷроияи ҳокимияти давлатии вилоят ва шаҳру ноҳияҳо аз ҷараёни баргузории маъракаҳо давоми соли 2023 26 ҳазору 204 рейд гузаронида шуда, вобаста ба нақзи Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” 826 парванда тартиб дода шудааст.

Дар ин бора имрӯз Сулаймон Давлатзода, Кумитаи дин, танзими анъана ва ҷашну маросисми назди Ҳукумати кишвар хабар дод.

Ба гуфтаи Сулаймон Давлатзода ин теъдод нисбат ба соли гузашта 56 адад зиёд мебошад.

Ҳамчунин, гуфта шуд, ки тибқи маълумоти пешниҳоднамудаи Суди Олӣ дар соли 2023 аз ҷониби судҳо дар шаҳру навоҳии кишвар вобаста ба моддаи 481-и Кодекси ҳуқуқвайронкунии маъмурӣ барои риоя нагардидани талаботи Қонун “Дар бораи танзими анъана ва ҷашну маросим дар Ҷумҳурии Тоҷикистон” 826 парвандаи баррасишуда вобаста ба 818-тои он қарорҳои дахлдор бароварда шудааст. Маблағи умумии ҷаримаҳо зиёда 4,5 миллион сомониро ташкил медиҳад.

Сабаби бештар гардидани қонуншиканиҳоро Сулаймон Давлатзода дар худнамойӣ ва надонистани қонуни марбута арзёбӣ намуд.

Бояд гуфт, ки дар Тоҷикистон солиёни зиёд аст, бобати танзими ҷашну маросимҳо қонуни дахлдор амал мекунад, аммо қонуншиканӣ дар ин самт ҳамоно зиёд мегардад.

Рустам ОДИНАЕВ, “ҶТ”