Раиси шаҳри Душанбе муҳтарам Рустами Эмомалӣ дирӯз зимни баргузории Иҷлосияи ҳабдаҳуми Маҷлиси вакилони халқи шаҳри Душанбе, даъвати шашум ба масъулин дастур додааст, ки ҷиҳати истифодаи самараноки қувваи барқ ва сарфа кардани он равшанидиҳии берунаи аксар биноҳо тариқи батареяҳои офтобӣ ба роҳ монда шавад.

Дар ин бора АМИТ “Ховар” бо истинод ба шуъбаи иттилоотии дастгоҳи Раиси шаҳри Душанбе хабар додааст.

“Раиси маҷлиси вакилони халқи шаҳри Душанбе муҳтарам Рустами Эмомалӣ ба муовинони соҳавӣ ва масъулин дастур доданд, ки истифодаи самараноки қувваи барқ, равшанидиҳии берунаи атрофи мактабу боғчаҳо, муассисаҳои тандурустӣ, биноҳои баландошёна ва дигар корхонаву ташкилотро тариқи батареяҳои офтобӣ ва таъмини гармиро ҳангоми бунёди корхонаҳои саноатии бузург тариқи дегхонаҳои автономӣ дар амал татбиқ намоянд,”- омадааст дар хабар.