Корпоратсияи чинии Datang ният дорад, дар вилояти Хатлон корхонаи саноатии батареяҳои офтобиро ба роҳ монад.

Дар ин бора хадамоти матбуоти раиси вилояти Хатлон иттилоъ медиҳад.

Тибқи иттилои манбаъ, дар ин маврид 11 июли соли равон, Давлаталӣ Саид раиси вилояти Хатлон бо Ван Хао, директори генералии Корпоратсияи чинии Datang дар Осиёи Марказӣ мулоқот намудаст.

Давлаталӣ Саид тақвият ва густариши робитаҳои корӣ бо ширкатҳои Чинро яке аз самтҳои афзалиятноки фаъолияти иқтисодии хориҷӣ арзёбӣ намуда, гуфтааст, ки “Мо, ҳамкориҳои минтақавиро унсури муҳими рушди иқтисоду тиҷорат, ҷалби сармоя ва ҷорӣ намудани технологияҳои муосир медонам”.

Дар навбати худ, Ван Хао директори генералии Корпоратсияи чинии Datang дар Осиёи Марказӣ изҳор доштааст, ки ният доранд дар вилояти Хатлон корхонаи саноатии батареяҳои офтобиро, ки энергияи тоза истеҳсол мекунанд, таъсис диҳанд. Ӯ гуфт, ки Корпоратсияи чинии Datang 14 сол паиҳам ба феҳристи Fortune Global 500 шомил гардидааст.

Раиси вилояти Хатлон аз пешниҳоди таъсиси корхона ҷонибдорӣ намуда, зикр кард, ки пас аз боздид аз минтақаҳои озоди иқтисодӣ ва дигар минтақаҳо барои ҳалли ин кор мусоидат хоҳад шуд.

Гуфта мешавад, ки корпоратсияи “China Datang”, ки соли 2002 таъсис ёфта, имрӯз ба яке аз бузургтарин таъминкунандагони нерӯи барқ дар кишвари Чин аст. Ширкати мазкур дар 31 музофоти Чин ва беш аз 10 кишвар ва минтақаҳои саросари ҷаҳон, аз ҷумла Мянма, Камбоҷа, Лаос, Индонезия, Узбекистон ва Сингапур фаъолият мекунад.

Фарзонаи УМАРАЛӢ, “ҶТ”