Бо вуҷуди дар сатҳи зарурӣ таъмин гардидани рушди иқтисоди кишвар дар нимсолаи аввали соли 2022 таъсири омилҳои берунӣ, бахусус буҳронҳои глобалии иқтисодию энергетикӣ ва озуқаворӣ ба баъзе соҳаҳои иқтисоди миллӣ эҳсос гардида, суръати он нисбат ба ҳамин давраи соли гузашта ба андозаи 1,3 банди фоизӣ коҳиш ëфт.

Ин нуктаро имрӯз Завқӣ Завқизода, вазири рушди иқтисод ва савдои кишвар зимни нишасти матбуотӣ иброз намуд.

Гуфта шуд, ки дар ин давра рушди ММД аз ҳисоби афзоиши ҳаҷми истеҳсоли маҳсулоти саноатӣ - 17 фоиз, кишоварзӣ -7,2 фоиз, маблағгузорӣ ба сармояи асосӣ - 2,5 фоиз, боркашонӣ - 18 фоиз, хизматрасонии пулакӣ -12,8 фоиз, мусофиркашонӣ - 11 фоиз, гардиши савдои дохилӣ- 8,6 фоиз ва гардиши савдои хориҷӣ - 14,6 фоиз таъмин гардид.

Ба гуфти масъулин дар ин давра ҷиҳати ноилшавӣ ба ҳадафи чоруми миллӣ - саноатикунонии босуръати кишвар 137 корхона ва коргоҳи нави саноатӣ бо 1296 ҷойҳои корӣ мавриди истифода қарор дода шуданд. Ҳамзамон гардиши савдои хориҷӣ, содироту воридоти мол афзоиш ëфт.