Андозаи нафақаи миёнда дар ҷумҳурӣ 106,17 сомонӣ зиёд гардида, аз 368,9 сомонӣ ба 475,07 сомонӣ баробар карда шуд.

Дар ин бора Абдураҳмон Ҳалимзода, директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон 5-уми феврал зимни нишасти матбуотӣ иттилоъ дод.

Мувофиқи иттилои номбурда айни замон дар ҷумҳурӣ аз пардохти нафақа қарздорӣ вуҷуд надошта, шумораи умумии нафақагирон ба ҳолати 1-уми январи 2025 836 690 нафарро ташкил медиҳад. Аз ин миқдор шумораи умумии нафақагирони маъюб 167 108 нафар аст. Аз он ҷумла:

- гурӯҳи якум - 17 965 нафар
- гурӯҳи дуюм - 82 068 нафар
- гурӯҳи сеюм - 33 041 нафар
- маъюбон аз овони кӯдакӣ то синни 18 сола - 34 034 нафар
- шумораи кӯдакони ятими кулл - 1168 нафар
- шумораи кӯдакони нимятим - 77 502 нафар
- шумораи маъюбон ва иштирокчиёни ҶБВ солҳои 1941-1945 - 21 нафар
- шумораи иштирокчиёни Ҷанги Бузурги Ватани дар ақибгоҳ солҳои 1941-1945 - 140 нафар мебошад.

- Талабот барои маблағгузории нафақа дар соли 2024 баробари 4 млрд. 291,0 млн. сомониро ташкил намуда, маблағгузории пардохти он низ дар ҳамин ҳаҷм таъмин гардид, ки нисбат ба ҳамин давраи соли гузашта 934,4 млн. сомонӣ ё худ 27,8 фоиз афзоиш ёфтааст, - гуфт Абдураҳмон Ҳалимзода.

Ҳошим РАҲМАТУЛЛОЕВ, “ҶТ”