Раиси шаҳри Душанбе муҳтарам Рустами Эмомалӣ имрӯз зимни баргузории Иҷлосияи ҳаждаҳуми Маҷлиси вакилони халқи шаҳри Душанбе масъалаи вусъат додани ҳисоббаробаркуниҳои ғайринақдӣ ва таҳти назорат қарор додани ҷараёни иҷрои онро мавриди баррасӣ қарор дода, вобаста ба ин масъала ба масъулин супоришҳо дод.

Дар ин бора шабакаи телеграмии шаҳрдорӣ иттилоъ медиҳад.

- Дар идомаи иҷлосия вакилон рафти иҷрои Нақшаи чорабиниҳои Мақомоти иҷроияи ҳокимияти давлатии шаҳри Душанбе оиди дар амал татбиқ намудани Фармони Президенти Ҷумҳурии Тоҷикистон аз 22 июни соли 2023, №586 "Дар бораи тадбирҳои вусъат додани ҳисоббаробаркунии ғайринақдӣ"-ро мавриди муҳокима қарор доданд, -менависад манбаъ.

Гуфта мешавад, ки Раиси маҷлиси вакилони халқи шаҳри Душанбе ба муовини якум, муовинони раиси шаҳр ва дигар сохторҳои дахлдор, ҷиҳати вусъат додани ҳисоббаробаркуниҳои ғайринақдӣ дар тамоми соҳаҳо ва таҳти назорат қарор додани ҷараёни иҷрои он дастуру супоришҳои мушаххас дод.

Ҳамзамон, зикр гардид, ки дар рафти Иҷлосия, стратегия ва нақшаи чорабиниҳои Мақомот оид ба эълон намудани солҳои 2022-2026 "Солҳои рушди саноат" мавриди баррасӣ қарор гирифт.
Рустам Эмомалӣ ба муовини раиси шаҳри Душанбе якҷо бо раисони ноҳияҳои шаҳри Душанбе ва сохторҳои дахлдор дастур доданд, ки вобаста ба стратегияи мазкур, ки бунёди коргоҳу корхонаҳои нави истеҳсолӣ, ба кор андохтани корхонаҳои аз фаъолият бозмонда ва ташкили ҷойҳои нави корӣ, тақвият бахшидани рушди содирот ва васеъ намудани имкониятҳои содиротӣ ва дар муҳлати муайяншуда ба истифода додани корхонаҳое, ки ифтитоҳашон ба нақша гирифта шудааст, тадбирҳои заруриро андешанд.

Фарзонаи УМАРАЛӢ, "ҶТ"