Дар соли 2023 ба Хадамоти иҷрои назди Ҳукумати Ҷумҳурии Тоҷикистон 10 ҳазору 912 ҳуҷҷати иҷро оид ба ситонидани маблағи алимент ворид гардидааст.

Дар ин бора Барно Саидвализода, сардори Хадамоти иҷрои назди Ҳукумати Ҷумҳурии Тоҷикистон зимни нишасти матбуотии ин ниҳод иттилоъ дод.

Номбурда ҳамчунин қайд кард, ки аз ҷониби иҷрочиён ба манфиати модару кӯдак дар ин давра зиёда аз 33 млн 300 ҳазор сомонӣ маблағи алимент ситонида шудааст.

- Бинобар бадқасдона саркашӣ намудани қарздорон аз пардохти маблағи алимент нисбати 398 нафар қарздорон тибқи талаботи моддаи 177 ҚҶ Ҷумҳурии Тоҷикистон бо пешниҳоди иҷрочиён аз ҷониби мақомоти прокуратура парвандаҳои ҷиноятӣ оғоз гардидааст. Нисбати 568 нафар қарздорон барои сари вақт напардохтани маблағи алимент ва пинҳон кардани суроғаи ҷои зисташон аз ҷониби иҷрочиёни мақомоти иҷро бо қабули қарорҳои дахлдор кофтуков эълон шудааст, - гуфт номбурда.

Ҳошим РАҲМАТУЛЛОЕВ, “ҶТ”