Соли 2022 дар вилояти Хатлон содироти маҳсулоти кишоварзӣ афзош ёфта, он ба 7 кишвари ҷаҳон содирот шудааст. Дар ин бора маркази матбуоти МИҲД вилояти Хатлон иттилоъ медиҳад.

Бино ба иттилои манбаъ, дар давраи ҳисоботӣ, гардиши савдои хориҷӣ ба 498,2 миллион доллар расидааст, ки аз он 238,2 миллион доллар содироти молу маҳсулот ва 260 миллион доллари дигар воридотро ташкил додааст.

Гуфта мешавад, ки ҳаҷми содирот дар қиёс нисбати ҳамин давраи соли гузашта 135,3 дарсад ё баробари 62,2 миллион доллар зиёд мебошад.

Аз ҷумла, дар давраи ҳисоботӣ тавассути дидбонгоҳҳои гумрукии вилоят 31,3 ҳазор тонна нахи пахта, 11,8 ҳазор тонна калобаи ресандагӣ, 1,2 ҳазор тонна матоъ, 1,7 млрд. кв. соат. неъруи барқ, 418,4 ҳазор тонна семент, 269,4 ҳазор тонна ангишт аз ҳудуди вилоят содирот шудааст.

Ҳамзамон тибқи иттилоъ, соли 2022 аз ҳудуди вилоят ба хориҷи кишвар 23,8 ҳазор тонна маҳсулоти соҳаи кишоварзӣ, аз ҷумла 20 ҳазор тонна таввасути нақлиёт ва тайёра, 3819 тонна бо тариқи роҳи оҳан ба берун аз ҷумҳурӣ, ба давлатҳои Русия, Афғонистон, Ӯзбекистон, Туркия, Қазоқистон, Покистон ва Белорусия содирот карда шуд.

“Маҳсулоти содиротгардида, асосан 6044 тонна сабзавот, аз ҷумла 4157 тонна пиёз, 330 тонна полезиҳо, 5038 тонна мевагиҳо ва лимон, 10863 тонна ангур ва 1528,3 тонна дигар маҳсулотҳоро ташкил медиҳад”,- таъкид менамояд манбаъ.