Кумитаи меъморӣ ва сохтмони назди Ҳукумати ҷумҳурӣ мутобиқи Кодекси шаҳрсозии Ҷумҳурии Тоҷикистон дар қаламрави кишвар нисбати сифати корҳои сохтмонию васлкунии 65 шаҳру ноҳия дар 1186 адад иншоот 3119 санҷишҳо гузаронида, аз онҳо 3825 камбуди ошкор кардааст.

Ин нуқтаро имрӯз, 18 январ раиси Кумитаи меъморӣ ва сохтмони кишвар Аҳмадзода Ҷамшед иброз дошта, қайд намуд, ки: “Дар рафти санҷиш маълум гардид, ки биноҳо аз масолеҳе сохта шудаанд, ки ё сифати паст доранд ва ё муҳлати истифодабариашон гузаштааст. Афроди масъул дар ҳаҷми 507900 сомонӣ ҷарима карда шуданд”.

Аҳмадзода Ҷ. дар идомаи суҳбати худ иброз дошт, ки масъулин ҷиҳати кам кардани камбудиҳо дар иншоотҳои сохтмонӣ дар назди Кумита лабараторияи махсус барои санҷиши масолеҳи сохтмонӣ ташкил кардаанд: “Дар охири соли 2016 бо кумаки Бонки ҷаҳонӣ ва ташаббуси Кумитаи сармоягузорӣ мо 37 намуд таҷҳизотҳои лабараторӣ харидорӣ намудем. Бо истифода аз инҳо мо метавонем, ки бе вайрон кардани иншоот камбудиҳои онро ошкор кунем”-гуфт раиси Кумитаи меъморӣ ва сохтумон.

Хуршед МАВЛОНОВ,"ҶТ"