Дар соли 2023 як гурӯҳи калони корхонаҳои саноатӣ ба Вазорати саноат ва технологияҳои нави Ҷумҳурии Тоҷикистон вобаста ба сифр баробар будани даромади корхонаҳояшон ҳисобот додаанд.

Дар ин бора Шералӣ Кабир, вазири саноат ва технологияи нави кишвар зимни нишасти хабарии ниҳодаш иттилоъ дод.

Ӯ гуфт теъдоди ин корхонаҳо ба 426 адад мерасад ва “пешниҳод кардани баланси сифрӣ маънии барҳам хӯрдани корхонаҳоро надорад”.

- Он корхонаҳое, ки ҳисоботи сифрӣ пешниҳод кардаанд, қобилияти истеҳсолӣ доранд. Агар дар ду сол онҳо нишондодҳои сифрӣ пешниҳод кунанд, баъд ба гурӯҳи корхонаҳои бозистода ворид карда мешаванд, - гуфт Шералӣ Кабир.

Ин шарҳи вазири саноат ва технологияҳо нав дар ҳолест, ки расонаҳо пайваста намоишӣ будани баистифодадиҳии корхонаҳои саноатиро зери тозиёнаи танқид қарор медиҳанд.

Ахиран Презденти мамлакат дар ҷаласаи васеи Ҳукумати кишвар вобаста ба ҳамин масъала муовини Сарвазири мамлакат Усмоналӣ Усмонзода, вазири саноат ва технологияҳои нав Шералӣ Кабир ва роҳбарони мақомоти иҷроияи маҳаллии ҳокимияти давлатӣ вазифадор карда буданд, ки “ҷиҳати ноил шудан ба ҳадафи саноатикунонии босуръати кишвар тавассути ба истифода додани иқтидорҳои нави истеҳсолӣ, ба кор андохтани иқтидорҳои бозистода ва пешгирӣ кардани раванди аз фаъолият бозмондани корхонаҳои саноатӣ, афзоиш додани истеҳсоли молу маҳсулоти рақобатноки ивазкунандаи воридот ва ба содирот нигаронидашуда чораҳои муассир андешанд”.

Рустам ОДИНАЕВ, “ҶТ”