Имрӯз дар Кохи Истиқлоли шаҳри Душанбе Форуми байналмилалии сармоягузории “Душанбе-инвест 2023” оғоз гардид. Дар оғози форуми мазкур Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба иштирокдорони Форуми байналмилалӣ бо паёми видеоӣ муроҷиат намуданд.

Дар ин бора иттилоъ АМИТ “Ховар” иттилоъ дод.

Бино ба иттилои ин агентӣ дар қисмати расмии ифтитоҳи Форуми байналмилалии сармоягузории Душанбе - 2023 Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ ва Сарвазири Ҷумҳурии Тоҷикистон муҳтарам Қоҳир Расулзода суханронӣ намуданд.

Дар кори Форуми байналмилалии сармоягузории Душанбе – 2023 ҳамчунин Сарвазири Озарбойҷон муҳтарам Алӣ Асадов, муовини Сарвазири Русия Марат Хуснуллин, муовини Сарвазир - роҳбари Дастгоҳи Ҳукумати Қазоқистон Галимжан Койшибаев меҳмонони олимақом аз дигар давлатҳо, инчунин роҳбарони вазорату идораҳои дахлдори мамлакат иштирок доранд.

Дар кори форум беш аз 600 нафар соҳибкорону сармоягузорони якчанд давлатҳои олам ва намояндагони созмонҳои бонуфузи байналмилалии молиявӣ иштирок доранд.

Ҳадаф аз баргузории форуми мазкур, муаррифии бештари зарфияту фазои мусоиди сармоягузории Тоҷикистон, ҷалби сармоя, ба роҳ мондан ва тақвияти ҳамкорӣ байни ширкатҳои ватанӣ ва сармоягузорони хориҷӣ мебошад.

“ҶТ”