Дар нимсолаи аввали соли ҷорӣ Палатаи ҳисоб дар вазорату идораҳо, марказ ва гурӯҳҳои татбиқи лоиҳаҳои сармоягузорӣ, бонкҳо, субъектҳои хоҷагидорӣ ва дигар муассисаҳои буҷетӣ 67 чорабинии аудиторӣ гузаронда, қоидавайронкуниҳои молиявиро ба маблағи 183,9 млн. сомонӣ муайян намуд, ки нисбат ба ҳамин давраи соли гузашта 87,1 млн. сомонӣ зиёд мебошад.

Дар ин бора имруз, 7 август Қарахон Чилазода, раиси Палатаи ҳисоби кишвар ба хабарнигорон иттилоъ дод.

Гуфта шуд, ки қоидавайронкуниҳои молиявиро асосан хароҷотҳои ғайриқонунии пулию молӣ, камомад ва тасарруфи воситаҳои пулию молӣ, изофанависӣ дар корҳои таъмиру сохтмонӣ, фурӯш ва иҷораи амволи давлатӣ, талафи воситаҳои пулию молӣ, маблағҳои кам ҳисобгардида ва рӯйпӯшнамудаи андозҳо, пардохти ҳатмӣ ва дигар пардохтҳо ташкил додаанд.

- Ҷиҳати бартараф намудани ин камбудиҳо тадбирҳои мушаххас андешида шуда, қоидавайронкуниҳои молиявӣ ба маблағи 182,5 млн. сомонӣ, аз ҷумла ба буҷет 114,1 млн. сомонӣ, ба корхонаҳо 44,4 млн. сомонӣ ва тавассути мақомоти ҳифзи ҳуқуқ 24,0 млн. сомонӣ барқарор карда шуд, ки 99,2 фоизро ташкил медиҳад, - гуфт Қ. Чилазода.

Ҳамчунин, дар натиҷаи гузаронидани чорабиниҳои аудиторӣ истифодаи ғайримақсадноки воситаҳои давлатӣ ба андозаи 4,4 млн. сомонӣ муайян гардидааст. Дар ин давра дар сохторҳои вазорату кумитаҳо ва ташкилоту муассисаҳои давлатӣ 20 чорабинии аудиторӣ гузаронида шуда, қоидавайронкуниҳои молиявӣ ба маблағи 20,7 млн. сомонӣ муайян ва барқарор карда шудааст.