20-21 сентябр дар шаҳри Душанбе Конференсияи байналхалқии илми–амалӣ таҳти унвони «Эҳёи Шоҳроҳи Абрешим ва иштироки кишварҳои Осиёи Марказӣ» доир гардид. Дар он намояндагони Вазорати маориф ва илм, Кумитаи ҷавонон, варзиш ва сайёҳӣ иштирок ва суханронӣ намуданд.

Инчунин, дар кори конфронс ҷонишини директори Институти тадқиқоти стратегии назди Президенти Ҷумҳурии Қазоқистон Санат Кушкумбаев, сардори Маркази идораи инноватсионии Донишгоҳи давлатии Синтсзян, профессор Сун Хуэй, мудири шуъбаи Институти археология ва этнографияи Академияи илмҳоии Туркманистон, профессор Хан Дурди Гурбанов дар мавзӯъҳои «Долони нақлиётии Авруосиё ва Қазоқистон: имконият ва мушкилот», «Ҷойгоҳ ва нақши Чин ва Тоҷикистон дар бунёди Роҳи бузурги Абрешим», «Туркманистон дар Роҳи бузурги Абрешим: таърих ва тамоюлҳои муосир» маърӯза намуданд.

Конфронси байналмилалии илмӣ-амалии «Эҳёи Шоҳроҳи бузурги Абрешим ва иштироки кишварҳои Осиёи Марказӣ» дар ду бахш баргузор гардида, бахши якум ба иқтисод, инфрасохтор, нақлиёт, боркашонӣ ва бахши дуюм ба геополитика, фарҳанг, туризм ва инноватсия бахшида шуд.

Бояд қайд намуд, ки Конфронси мазкур бо ташаббуси Донишгоҳи миллии Тоҷикистон дар якҷоягӣ бо Фонди миллии «Шоҳроҳи Абрешим – Шоҳроҳи ваҳдат» доир гардид.