Озмуни “Армуғон-2017”, ки аз тарафи Ассотсиатсияи миллии занҳои соҳибкори Тоҷикистон миёни занони ҳунарманди минтақаҳои вилояти Хатлон моҳи марти соли равон эълон гардида буд, дар Театри мусиқӣ–мазҳакавии ба номи Ато Муҳаммадҷонови шаҳри Қӯрғонтеппа ҷамъбаст гардид.

Озмуни мазкур дар доираи Лоиҳаи “Соҳибкории бонувон воситаи васеъ намудани ҳуқуқ ва имкониятҳои занон”, дар ҳамкорӣ бо Раёсати кор бо занон ва оилаи вилояти Хатлон ва шарикони рушд барпо гардида буд.

Тибқи низомнома барои иштирок дар озмун 300 нафар занони ҳунарманд намунаи беҳтарини маҳсули корашонро барои баҳогузорӣ ба ҳайъати комиссия пешниҳод намуда, аз ин 25 нафарашон ҳамчун ғолиб қадрдонӣ гардиданд.

Ҳамин тавр се нафар ғолиби кулл барои табодули таҷриба ба Ҷумҳурии Ӯзбекистон, панҷ нафар ба саёҳати омӯзишӣ ба вилояти Суғд роҳхат гирифтанд.

Ҳамчунин директори ҶДММ “Озара” Тахмина Каримова ба ҳашт нафар иштирокчиёни озмун, ки сифати маҳсулоташон беҳтар дониста шуд, мошинаи дарздӯзӣ ва дигар туҳфаҳо тақдим намуд.

Мақсади озмун рушди ҳунарҳои миллӣ, эҳёи корҳои дастӣ ва хонагӣ, боло бурдани сифати маҳсулоти ҳунармандӣ, рақобатпазир гаштани онҳо дар бозори ҷаҳонӣ ва муайяну дастгирӣ намудани беҳтарин занони ҳунарманд мебошад.

Дар фарҷом ҳунармандони Театри мусиқӣ-мазҳакавии ба номи Ато Муҳаммадҷонов бо барномаи фарҳагӣ хотири ҷамъомадагонро болида гардониданд.

Умед Мирзоев, “ҶТ”