11 август дар шаҳри Қӯрғонтеппа намоишгоҳи ҷумҳуриявии дастовардҳои соҳаи меъморӣ ва шаҳрсозӣ, масолеҳи сохтмонии ватании воридотивазкунанда ва озмуни “Беҳтарин истеҳсолкунандаи хишт - 2017” баргузор гардид.

Дар он муовини Сарвазири кишвар Азим Иброҳим, раиси вилояти Хатлон Давлатшоҳ Гулмаҳмадзода, иҷрокунандаи вазифаи раиси шаҳри Қӯрғонтеппа Абдуалим Исмоилзода, раиси Кумитаи меъморию сохтмони назди Ҳукумати Ҷумҳурии Тоҷикистон Ҷамшед Аҳмадзода ва дигар сохторҳои марбута иштирок доштанд.

Азим Иброҳим иброз намуд, ки “Манзалати сохтмончӣ сол аз сол боло меравад. Пас, ҷамъиятҳои истеҳсолию ташкилотҳои сохтмониро мебояд, ки зимни лоиҳакашию бунёди иншоотҳо ба махсусиятҳои меъмории миллӣ бартарӣ диҳанд. Ҳар як сайёҳ, ки ба кишвари мо меояд, дидан баробар аз кишвари мо эҳсос кунад, ки мо чӣ миллате ҳастем ё то кадом андоза тамаддуни бои бостонӣ дорем. Барои ин мо бояд ҳама маҳсулоти сохтмониро дар дохили кишвар истеҳсол кунем”.

Дар ин намоиш аз ҳама гӯшаю канори ҷумҳурӣ маҳсулоти худро пешкаши меҳмонон намуда, ба хиштҳои сафолӣ, болопӯшҳои сафолӣ, пластикӣ, сутуну бардевориҳои ороишӣ, дару тирезаҳои пластикӣ, чӯбӣ, қубурҳои пластмасӣ, семент ва гаҷи корхонаҳои “Субҳи Сарбанд”, “Ауфен”, “Хуаҷиан Ғаюр Индастриал”, “Арча”, “Созмон”, “Суғд Пластик” баҳои баланд дода шуд.

Ҷамшед Аҳмадзода дар ин робита афзуд, ки “Ба хотири тавлиди масолеҳи воридотивазкунанда мо бояд истеҳсоли ҳама гуна маводи бинокориро дар дохили кишвар ба роҳ монем ва дар ин замина талаботи меъмории шарқиро ба инобат гирем”.

Дар фарҷоми намоиш фаъолони намоиш ва ғолибони озмун аз ҷониби мақомоти иҷроияи ҳокимияти давлатии вилояти Хатлон ва Кумитаи меъморию сохтмони назди Ҳукумати ҷумҳурӣ бо туҳфаю сипосномаҳо сарфароз гардонида шуданд.

Умед МИРЗОЕВ, “ҶТ”