Палатаи ҳисоби Ҷумҳурии Тоҷикистон соли 2023 дар вазорату идора ва дигар муассисаҳои буҷетии кишвар 166 маротиба санҷишҳои аудиторӣ гузаронда, дар ин самт бо маблағи 405,6 млн. сомонӣ қонуншиканиҳои молиявиро ошкор намудааст.

Дар ин бора имрӯз - 14 феврал Қарахон Чиллазода, раиси Палатаи ҳисоб зимни нишасти хабарӣ иттилоъ дод.

Ба гуфтаи Чиллазода дар соли 2023 қонуншиканиҳо дар самти истифодаи мақсадноки маблағҳои буҷетӣ афзуда, нисбат ба як соли қабл 28,8 млн.сомонӣ зиëд мебошад.

Ӯ гуфт, ки вобаста ба ин аз ҷониби масъулини Палата дар ин давра 67 мавод тартиб дода шуда, барои чораҷӯӣ ва қабули қарорҳои дахлдор ба мақомоти ҳифзи ҳуқуқ ирсол гардидааст. Дар натиҷаи санҷиши санадҳо мақомот аз нафарони ба қонуншиканӣ дастзада бо маблағи умумии 90,6 млн. сомонӣ ҷарима ситонида шудааст.

Гулафшон КАРИМОВА, “ҶТ”