Дар доираи тадбирҳои андешидаи Ҳукумати кишвар баҳри рушд бахшидани соҳаи фарматсевтӣ ва ба ин васила зиёд кардани маҳсулоти воридотивазкунанда 12 феврал дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон миёни Ҳукумати Ҷумҳурии Тоҷикистон ва Ҷамъияти дорои масъулияти маҳдуди “Разес Фарма” оиди сохтмони як маҷмааи истеҳсоли дору ва молҳои тиббӣ созишнома ба имзо расид.

Дар ин бора сомонаи расмии Кумитаи давлатии сармоягузорӣ ва идораи амволи давлатӣ иттилоъ додааст.

Бино ба иттилои манбаъ, тибқи созишномаи баимзорасида сохтмон ва истифодабарии Маҷмааи истеҳсоли дору ва молҳои тиббӣ ба маблағи умумии беш аз 70 млн. сомонӣ ба нақша гирифта шудааст.

Гуфта мешавад, ки баъди пурра ба кор даровардани корхонаи мазкур барои сокинони кишвар зиёда аз 200 ҷойи кори доимӣ фароҳам оварда мешавад.

Ёдрас мешавем, ки Президенти мамлакат муҳтарам Эмомалӣ Раҳмон зимни ироаи Паёми имсолаашон ба Маҷлиси Олӣ аз вазъи соҳаи фармасевтӣ изҳори нигаронӣ карда, ба масъулин барои ислоҳи камбудиҳои дар соҳа ҷойдошта дастуру супоришҳо дода буданд.

“Ақаллан як намуди дорувориро дар кишвар истеҳсол кунед. Зиёд не 50% -и истеҳсоли дорувориро дар кишвар ба роҳ монед. Қариб 90 фисади доруворӣ аз хориҷи кишвар аст”,- гуфта буданд Президенти кишвар.