Барои ҷоннок намудани корҳои ҷустуҷӯию геологӣ, беҳсозии фаъолияти ҳамаи сохторҳои соҳаи геология, ҷалби сармоя ва ворид намудани техникаю технологияи муосири соҳа, ҳамчунин гузаштан ба низоми муосири рақамӣ ва стандартҳои байналмилалии ҳисоби захираҳо дирӯз дар маҷлиси Ҳукумати кившар Президенти мамлакат ба масъулин супориш додаанд.

Пешвои миллат таъкид кардаанд, ки истихроҷ ва коркарди маъданҳо ба хусус маъданҳои нодир метавонад ба яке аз муҳимтарин роҳҳои рушди иқтисоди миллии кишвар табдил ёбад.
Дар ин бора хадамоти матбуоти Президенти кишвар иттилоъ додааст.

Ба иттилои манбаъ дар маҷлис Илҳомҷон Оймуҳаммадзода, сардори Саридораи геология оид ба натиҷаи фаъолияти 6-солаи мақомот (2018-2023) ҳисобот дода, гуфтааст, ки ниҳоди зери идорааш барои омӯзиши геологии сарватҳои зеризаминӣ аз рӯи 56 лоиҳа дар иншооти корҳои минтақавӣ кор карда истодааст.

Ҳамчунин, гуфта шуд, ки Саридораи геология дар 6 соли охир корҳои шартномавиро низ аз рӯи зиёда аз 1200 лоиҳа ба маблағи 118,2 млн сомонӣ иҷро намудааст.