Соли 2022 аз ҷониби 15 субъекти воридкунанда ба ҷумҳурӣ 396,71 ҳазор тонна гази моеъ ба маблағи 197,72 млн. доллар бо нархи миёнаи 498 доллар барои як тонна ворид карда шудааст, ки аз ин 84,15 фоизи воридот аз Ҷумҳурии Қазоқистон, 8,27 фоиз аз Ҷумҳурии Узбекистон, 4,41 фоиз аз Федератсияи Русия ва 0,17 фоиз аз Ҷумҳурии Туркманистон мебошад.

Дар ин бора 7 феврал Муминзод Абдулмаҷид, сардори Хадамоти зиддиинҳисории назди Ҳукумати Ҷумҳурии Тоҷикистон зимни нишасти хабарӣ иттилоъ дод.
Гуфта шуд, ки дар моҳи декабри соли ҷорӣ нархи миёнаи воридоти гази моеъ ба 545 доллар баробар шудааст, ки нисбат ба моҳи январи ҳамин сол 137 доллар коҳиш ёфтааст.

Номбурда яке аз сабабҳои коҳишёбии нархи фурӯши чаканаи гази моеъ дар моҳи январро ба поён рафтани нархи 1 тоннаи он дар корхонаҳои истеҳсоли маҳсулоти нафтӣ рабт дода, таъкид дошт, ки сабабҳои асосии тағйир ёфтани нархи сӯзишворӣ дар бозори дохилӣ, ин давоми соли 2022 ноустувор будани арзиши нафт дар бозори ҷаҳонӣ ба ҳисоб меравад. Арзиши 1 барели он аз 78 доллари моҳи январ то 123 доллар дар моҳи июн афзоиш ёфта, дар охири моҳи декабр ба 83 доллар баробар гардид.