Тибқи ҳисоботҳои оморӣ, дар соли 2025 дар дастгоҳи марказии Хадамоти иҷрои назди Ҳукумати Ҷумҳурии Тоҷикистон ва сохторҳои ҳудудии он дар маҷмуъ 141 ҳазору 686 адад истеҳсолоти иҷро ва арзу муроҷиат шахсони воқеию ҳуқуқӣ вобаста ба таъмини иҷрои санадҳои судӣ, санадҳои мақомоти давлатӣ ва шахсони мансабдор мавриди баррасӣ қарор гирифтааст. Ин нишондиҳанда нисбат ба соли 2024, ки 134 ҳазору 676 ададро ташкил медод, афзоиш ёфтааст.

Дар ин хусус имрӯз - 10 феврал, Аҳтам Абдуллозода, раиси Хадамоти иҷро зимни нишасти матбуотӣ иттилоъ дод.

Ба гуфтаи ӯ, таҳлили фаъолияти Хадамот дар самти иҷрои санадҳои вобаста ба ситонидани алимент нишон медиҳад, ки то охири соли 2024 ҳамагӣ 103 ҳазору 392 адад истеҳсолоти иҷрои алимент дар баррасӣ қарор дошт. Бо ҷамъбасти фаъолияти Ситоди махсуси назди сардори Хадамоти иҷрои назди Ҳукумати Ҷумҳурии Тоҷикистон, ки барои ҳалли мушкилоти пардохти алимент таъсис дода шудааст, аз ин шумора 18 ҳазору 770 адад истеҳсолоти иҷро бо асосҳои қонунӣ қатъ гардидааст.

Дар натиҷа, ба охири соли 2025 дар баррасии Хадамоти иҷро 89 ҳазору 810 адад истеҳсолоти иҷро дар самти алимент боқӣ мондааст, ки коҳиши назаррасро дар ин самт нишон медиҳад.

Ҳамзамон, аз шумораи умумии истеҳсолоти иҷро ва муроҷиатҳои воридшуда, 97 ҳазору 51 адад истеҳсолоти иҷрои солҳои қаблӣ дар самти ситонидани алимент мавриди иҷро қарор доштааст, ки нисбат ба соли 2024 92 ҳазору 109 адад зиёд мебошад. Инчунин, дар давраи ҳисоботӣ 2 ҳазору 86 муроҷиати шахсони воқеию ҳуқуқӣ ва 42 ҳазору 549 ҳуҷҷати иҷро вобаста ба таъмини иҷрои санадҳои судӣ ва санадҳои мақомоти давлатӣ ворид гардидааст.

Раиси Хадамот афзуд, ки аз шумораи ҳуҷҷатҳои воридшуда 1 ҳазору 321 адад бинобар мутобиқат накардан ба талаботи Қонуни Ҷумҳурии Тоҷикистон “Дар бораи истеҳсолоти иҷро” барои бартараф намудани камбудиҳо баргардонида шуда, нисбати 41 ҳазору 224 адад ҳуҷҷати иҷро қарор дар бораи оғози истеҳсолоти иҷро қабул гардидааст.

Малика МУҚАДДАМОВА, “ҶТ”