Бо мақсади ба роҳ мондани содироти маҳсулоти ватанӣ байни КВД “Тоҷагропроэкспорт”-и Агентии содирот ва ширкатҳои ҳавопаймоии “Сомон Эйр”, “Ютеер”, “S7” ва “Ал Ҷазира” санадҳои ҳамкорӣ ба имзо расида, ҷонибҳо ба мувофиқа расиданд, ки ҳамкории судмандро дар соҳаи интиқоли молу маҳсулоти кишоварзию саноатӣ, аз ҷумла маҳсулоти тезвайроншаванда тавассути ҳавопаймо ба хориҷи кишвар ба роҳ монанд.

Дар ин бора Баҳриддин Сироҷидинзода, директори Агентии содироти назди Ҳукумати Ҷумҳурии Тоҷикистон зимни нишасти хабарӣ иттилоъ дод.

Ҳамзамон, номбурда изҳор дошт, ки барои муаррифии бештари маҳсулоти ватанӣ соли сипаришуда дар Ҳамоиши байналмилалии тиҷорати электронӣ “WORlDDEF-Dubai 2024”, ки дар шаҳри Дубайи Амороти Муттаҳидаи Араб баргузор гардид, дар қатори беш аз 5000 ширкати байналмиллалӣ иштирок карда, маҳсулоти Тоҷикистонро муаррифӣ кардаанд.

- Қобили қайд аст, ки дар ин Намоишгоҳ ба намояндагони Ҷумҳурии Тоҷикистон бо зоҳир намудани таваҷҷуҳи махсус имкон дода шуд, ки иқтидору имкониятҳои сармоягузориву содиротии кишварро дар сатҳи баланд муаррифӣ намоянд, - гуфт Сироҷиддинзода.

Наҷиба МУРОДБЕКОВА, “ҶТ”