Соли 2022 Вазорати молияи Ҷумҳурии Тоҷикистон ба соҳаҳои иҷтимоию иқтисодии кишвар аз буҷети давлатӣ 34,8 миллиард сомонӣ ҷудо намудааст.

Файзиддин Қаҳҳорзода, вазири молияи кишвар 17 феврал зимни нишаст дар ин бора маълумот дода, ҳамзамон гуфт, ки аз ҷумла маблағгузории соҳаҳои ҳокимият ва идоракунии давлатӣ дар ҳаҷми 1,9 млрд. сомонӣ, маориф 6,4 млрд. сомонӣ, тандурустӣ 2,6 млрд. сомонӣ, суғуртаи иҷтимоӣ ва ҳифзи иҷтимоӣ 4,3 млрд. сомонӣ, хоҷагии манзилию коммуналӣ 1,8 млрд. сомонӣ, фарҳанг ва варзиш 1,1 млрд. сомонӣ, комплекси сӯзишворию энергетикӣ 6,5 млрд. сомонӣ, кишоварзӣ, 1,1 млрд. сомонӣ ва дигар соҳаҳо таъмин карда шуданд.

Инчунин гуфта шуд, ки ба соҳаҳои иҷтимоӣ низ таваҷҷуҳи махсус зоҳир гардида, аз ҳисоби буҷети давлатӣ бо дарназардошти хароҷоти соҳаи хоҷагии манзилию коммуналӣ ба ин соҳаҳо 16,3 млрд. сомонӣ равона гардид.

-Бо мақсади таъмини уҳдадориҳои иҷтимоии давлат, аз ҷумла барои пардохти саривақтии музди меҳнати кормандони ташкилоту муассисаҳои буҷетӣ 7,2 млрд. сомонӣ, идрорпулӣ 139,9 млн. сомонӣ, нафақа 3,3 млрд. сомонӣ, ҷубронпулӣ кумакпулиҳо дар ҳаҷми умумии 675,5 млн. сомонӣ, ҳамзамон бо мақсади пардохти саривақтии фонди музди меҳнат ва ҳисоби буҷети ҷумҳуриявӣ ба шаҳру ноҳияҳои мамлакат мусоидати молиявӣ дар ҳаҷми 1142,4 млн. сомонӣ пардохт гардид, - гуфт вазир.