Дар ҳудуди вилояти Суғд дар 9 моҳи соли 2024 ҳаҷми истеҳсоли маҳсулоти саноатӣ ба 20 миллиарду 360,7 миллион сомонӣ расонида шудааст, ки нисбат ба ҳамин давраи соли гузашта суръати афзоиш бо назардошти индекси нархҳо 113,5 фоиз таъмин гардидаст.

Дар ин бора аз Мақомоти иҷроияи ҳокимияти давлатии вилояти Суғд хабар доданд.

Мувофиқи маълумот, ба андозаи 284,7 ҳазор тонна орд, 3493,6 тонна равғани растанӣ, 3976,7 тонна маҳсулоти макаронӣ, 33411,9 тонна нон ва маҳсулоти нонӣ, 35196,7 ҳазор қуттии шартӣ консерваҳои гуногун, 14 712,8 ҳазор декалитр нӯшокиҳои беспирт истеҳсол шудааст. Афзоиши истеҳсоли маҳсулоти номбурда нисбат ба ҳамин давраи соли гузашта назаррас буда, истеҳсоли орд 130 фоиз, равғани растанӣ 116,5 фоиз, маҳсулоти макаронӣ 181,4 фоиз, нон ва маҳсулоти нонӣ 121,3 фоиз, консерваҳо 104,6 фоиз ва нӯшокиҳои беспирт 130,5 фоизро ташкил медиҳад.

Ҳамчунин, бояд ёдовар шуд, ки дар вилоят то имрӯз 1198 корхонаи саноатӣ, аз ҷумла, 37 корхонаи хизматрасонии саноатӣ ва 1161 корхонаи истеҳсолӣ ба қайд гирифта шудааст.

Ҷасури ҚИЁМИДДИН, "ҶТ"