Дар нимсолаи якуми соли 2023 аз ҷониби Суди Олӣ, Суди ВМКБ, судҳои вилоятҳои Суғду Хатлон, шаҳри Душанбе, судҳои ҳарбӣ ва шаҳру ноҳияҳои ҷумҳурӣ дар маҷмуъ 69 ҳазору 692 парванда ва дархосту пешниҳодҳо мавриди баррасӣ қарор дода шуданд, ки нисбат ба нимсолаи якуми соли гузашта 536 адад кам мебошад.

Дар ин бора 14-уми август Шермуҳаммад Шоҳиён, раиси Суди Олӣ дар нишасти матбуотии худ иттилоъ дод.

Бино ба иттилои раиси Суди Олӣ аз парвандаҳои баррасигардида дар марҳилаи якум 6163 ададро парвандаҳои гражданӣ, 21334 ададро парвандаҳои оилавӣ, 5543 ададро парвандаҳои ҷиноятӣ, 25442 ададро парвандаҳои маъмурӣ, 4080 ададро дархостҳои мақомоти тафтиши пешакӣ ва 3495 ададро пешниҳоди муассисаҳои ислоҳӣ, Хадамоти иҷро ва дигар ташкилоту муассисаҳо ташкил медиҳанд.

Вобаста ба риоя накардани Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” 419 парвандаҳои ҳуқуқвайронкунии маъмури нисбати 419 шахс баррасӣ шуда, аз онҳо ба 418 шахс ба маблағи умумии 2 миллиону 114 ҳазору 332 сомонӣ ҷарима татбиқ карда шудаст.

Инчунин қонунвайронкуниҳо ҷиҳати риоя накардани Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” ба 9761 адад расида, ба 8826 парванда нисбати 8835 нафар қарор қабул карда, ба 3178 нафар ҷазои огоҳӣ ва нисбати 5657 шахс ҷарима ба маблағи умумии 1 миллиону 155 ҳазору 204 сомонӣ таъин карда шудаст.

Яҳё МАҲМАДНАБИЕВ, “ҶТ”