Дар Ҷумҳурии Тоҷикистон дар нимсолаи аввали соли 2025 қонуншиканӣ вобаста ба риоя нагардидани талаботи Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” коҳиш ёфтааст.

Дар ин бора Сулаймон Давлатзода, раиси Кумитаи дин ва танзими ҷашну маросими назди Ҳукумати Ҷумҳурии Тоҷикистон имрӯз – 29 июл зимни нишасти хабарӣ иттилоъ дод.

Ба гуфтаи С. Давлатзода дар давраи ҳисоботӣ ҳамагӣ 630 парванда вобаста ба риоя нагардидани талаботи Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” дар Суди Олӣ баррасӣ гардидааст, ки нисбат ба ҳамин давари соли гузашта 225 ҳолат кам аст.

Гуфта шуд, ки дар ин давра аз ҷониби масъулини ин ниҳод ва комиссиҳои доимии маҳаллӣ оид ба танзими ҷашну маросим дар саросари кишвар 9607 рейд гузаронида шуда, ҳамагӣ 630 ҳолати қонунвайронкунӣ ошкор шудааст.

Ба иттилои раиси ин ниҳод дар шашмоҳаи аввали соли ҷорӣ дар саросари кишвар 41 ҳазору 630 маърака баргузор гаштааст.

Заррина ҚОСИМОВА, "ҶТ"