Тибқи маълумоти гумрукӣ дар соли 2023 ба ҷумҳурӣ 141,5 ҳазор тонна шакар ба маблағи 94,7 млн доллар бо нархи миёнаи 669 доллар барои 1 тонна ворид гардидааст, ки нисбат ба ҳамин давраи соли гузашта ба миқдори 13,6 ҳазор тонна ва ё 9,6 фоиз коҳишёбӣ ба назар мерасад.

Дар ин бора аз Хадамоти зиддиинҳисории назди Ҳукумати кишвар зимни нишасти хабарӣ ба “Ҷавонони Тоҷикистон” иттилоъ доданд.

Бино бар гуфти масъулини ин ниҳод дар соли 2023 нархи шакар дар бозори ҷаҳонӣ 61 доллар (муодили 666 сомонӣ) нисбати ҳамин давраи соли 2022 афзоиш ёфтааст, ки ин чиз ба гароншавии нархи маҳсулот таъсиррасон буд.

Масъулин сабаб ё омилҳои кам ворид шудани ин навъи маҳсулотро шарҳ надоданд. Ҳанӯз барои мо номаълум аст, ки оё талаботи мардум кам шудааст ё истеҳсоли онро дар дохили кишвар зиёд кардаанд.

Ҳамчунин, гуфта шуд, ки аз ҳаҷми умумии маҳсулоти воридгардида 31,4% ба Федератсияи Россия, 27,8 фоиз ба Ҷумҳурии Исломии Покистон, 26% ба Ҳиндустон, 12,4% ба Ҷумҳурии Беларусия, 1% ба Ҷумҳурии Исломии Эрон ва боқимонда 1,4% ба дигар давлатҳо рост меояд.

Воридкунандагони асосии ин навъи масулот ҶДММ “Баруманд” (22%), Агентии захираҳои моддии давлатии назди Ҳукумати Ҷумҳурии Тоҷикистон (12,4%), ҶСП “Оби Зулол” (10,8%), ҶДММ “Абубакри Дилшод” (18,3%), Фабрикаи қанодии “Амирӣ” (7%) ва дигар субъектҳои хоҷагидор 29,5% мебошанд.

Рустам ОДИНАЕВ, “ҶТ”