Соли 2024 дар кишвар аз ҷониби шахсони ҳуқуқӣ ва воқеӣ, дар маҷмуъ 247,1 ҳазор ҷойи кории нав таъсис дода шудааст. Дар ин бора имрӯз - 11 феврал Холмаҳмадзода Солеҳа, вазири меҳнат, муҳоҷират ва шуғли аҳолии Ҷумҳурии Тоҷикистон дар нишасти хабарӣ иттилоъ дод.

Бино ба иттилои вазир шумораи ҷойҳои кории нави таъсисдодашуда дар соли 2024 дар муқоиса ба соли 2023 16,4 ҳазор ё 7,1 фоиз зиёд мебошад.

Дар бахши воқеии иқтисодиёт ҳиссаи бештари ҷойҳои корӣ 108,6 ҳазор ҷойи корӣ (43,9 фоиз) ба соҳаи кишоварзӣ, шикор, хоҷагии ҷангал ва моҳипарварӣ ва 39,6 ҳазор ҷойи корӣ (16,0 фоиз) ба соҳаи сохтмон рост меояд.

Дар соҳаи саноат ва коркард дар давраи ҳисоботӣ 14,2 ҳазор ҷойи нави корӣ таъсис дода шудааст, ки нисбат ба соли гузашта (12,9 ҳазор ҷойи корӣ) 1,3 ҳазор зиёд мебошад.

Дар бахши хизматрасонии иқтисодиёт теъдоди назарраси ҷойҳои нав дар соҳаи савдои яклухт ва чакана (23,4 хазор ҷойи кор) таъсис дода шудааст, ки дар муқоиса нисбат ба соли 2023 2,7 хазор ҷойи кор ё 13,0 фоиз зиёд мебошад.

Яҳё МАҲМАДНАБИЕВ, “ҶТ”