Ширкати ҳавопаймоии «Тоҷик Эйр» нахустин парвозро ба самти Пекин бо 17 нафар мусофир иҷро намуд.

Ифтитоҳи хатсайри мазкур дар пайи имзои Созишномаи ҳамкорӣ байни ҶСК «Тоҷик Эйр» ва Иттиҳоди  сайёҳии Синтзян, дар доираи тафоҳумнома оид ба ифтитоҳи хатсайри мустақим байни пойтахтҳои Тоҷикистону Чин, ки аз ҷониби сарони ду кишвар ба тасвиб расид, имконпазир гардид.

Парвозҳо тавассути  ҳавопаймои Боинг 757  ҳафтае як маротиба рӯзи душанбе  сурат мегиранд. Вақти парвоз аз фурудгоҳи Душанбе 19:30 муқаррар гардида, давомнокии парвоз 5 соату 30 дақиқаро такшил медиҳад.

Ширкати ҳавопаймоии «Тоҷик Эйр» соли 1930 таъсис ёфта, дар ҳоли ҳозир парвозҳои мунтазамро ба шаҳрҳои Деҳлӣ (Ҳиндустон), Урумчӣ (Чин), Теҳрон (Эрон), Алмаато (Қазоқистон), Бишкек (Қирғизистон), Москва, Санкт-Петербург, Екатеринбург, Сургут ва Новосибирск (Федератсияи Русия) иҷро менамояд.