Палатаи савдо ва саноати Тоҷикистон дар нимсолаи дуюми соли 2016 14 созишнома дар бораи ҳамкорӣ бо ширкатҳо, палатаҳои савдо ва саноат ва идораҳои марбутаи кишварҳои Русия, Лаҳистон, Ҷумҳарии Мардумии Чин, Ҳиндустон, Қазоқистон, Белорус ва Узбекистон ба имзо расонидааст.

Шариф Саид, раиси Палатаи савдо ва саноат аз муносибатҳои иқтисодии Тоҷикистон бо кишварҳои минтақа, аз ҷумла Узбекистон изҳори қаноатмандӣ намуда, афзуд, ин ду кишвар як фазои муносибе барои муносибатҳои иқтисодӣ доранд. Ҳам ҷониби Тоҷикистон ва ҳам Узбекистон тарафдори онанд, ки муносибатҳоро густариш диҳанд.

- Мо дар давраи ҳисоботӣ ду намоишгоҳ доир кардем, ки дар яке 10 ва дар дигар 7 ширкати узбекистонӣ иштирок варзиданд. Ният дорем дар моҳҳои наздик намоишгоҳи маҳсулоти Узбекистонро дар кишвар баргузор намоем, - гуфт Ш. Саид.

Таъкид шуд, ки Тоҷикистон барои иштирок дар намоишгоҳи махсусгардонидашудаи байналмилалии ЭКСПО-2017, ки дар шаҳри Остонаи Қазоқистон баргузор мегардад, омодагии ҷиддӣ дида истодааст. Комиссари генералии Экспозитсияи Тоҷикистон дар ин намоишгоҳ Шариф Саид интихоб гардидааст.