Нигина Анварӣ, муовини вазири кишоварзӣ 25 июл зимни нишасти хабарӣ бо рӯзноманигорон гуфт, яке аз омилҳои баланд шудани нархи гӯшт дар Тоҷикистон ин аз хориҷи кишвар овардани хӯроки чорво мебошад.

- Воқеан ҳам, вобаста ба истеҳсол ва таъминот мо 99,9% бо гӯшт таъмин ҳастем. Баланд шудани нархи гӯшт дар кишвар аз чанд омилҳо вобастагӣ дорад. Хӯроки чорво бештар аз берун ворид мегардад ва нархи он қиммат шудааст, - зикр намуд муовини вазир.

Инчунин, масъулини вазорат сабаби дигари баланд шудани нархи гӯшт дар кишварро зиёд шудани талаботи мардум ба гӯшт рабт доданд.

- Имрӯз дар саросари кишвар барои таъмини аҳолӣ бо гӯшти моли калону паранда гӯшт аз ҷумҳурӣ содирот намешавад ва воридот ҳам намешавад. Ҳоло талабот ба гӯшт зиёд шуда истодааст. Талабот, ки дар бозор ҳаст, нарх низ баланд мешавад. Имрӯз талаботи мардум бештар ба гӯшти чорвои калон ва гӯсфанд зиёд гардидааст. Мо тамоми чораҳоро меандешем, то аҳолиро бо гӯшт таъмин намоем, - гуфт муовини вазир Мушокир Назарзода.

Ҳамзамон зикр гардид, ки имрӯз дар Тоҷикистон сари як нафар 47 кг гӯшти гов ва 18 кг гӯшти мурғ дар як сол рост меояд. Бояд дар ҷумҳурӣ 180 ҳазор тонна гӯшти паранда истеҳсол гардад, ки ҳоло то ин шумора нарасидааст.