Вазорати молияи Ҷумҳурии Тоҷикистон дар шаш моҳи соли 2023 нақшаи буҷети кишварро 108% иҷро намудааст.

Дар ин бора Файзиддин Қаҳҳорзода, вазири молияи кишвар 15 август дар нишасти матбуотиаш иттилоъ дод.

Ӯ зикр кард, ки бо дарназардошти иҷрои маҷмуи нақшаи даромади буҷети давлатӣ ба нақшаи даромадӣ буҷети ҷумҳуриявӣ 9,2 млрд сомонӣ ворид гардидааст.

- Хароҷоти буҷети давлатӣ дар моҳҳои январ июни соли ҷорӣ дар доираи нақшаи пешбинигардида ва даромадҳои воқеии буҷет амалӣ карда шуда, ба соҳаҳои иқтисодии кишвар зиёда аз 18,6 мрд сомонӣ равона гардидааст, - баён намуд вазир.

Ҳамзамон ӯ иброз дошт, ки аз ҷумла ба соҳаҳои ҳокимият ва идоракунии давлатӣ 913 млн сомонӣ, маориф 3,1 млрл сомонӣ, тандурустӣ 1,4 млрд сомонӣ, суғуртаи иҷтимоӣ ва ҳифзи иҷтимоӣ 2,1 млрд сомонӣ, хоҷагии манзилию коммуналӣ 964,3 млн сомонӣ, фарҳанг ва варзиш 585,9 млн сомонӣ, комплекси сӯзишворию энергетикӣ 3,1 млрд сомонӣ, кишоварзӣ 883,3 млн сомонӣ, сохтмон ва саноат 128,8 млн сомонӣ, нақлиёт ва коммуникатсия 1,7 млрд сомонӣ равона гардидааст.

Фарзонаи УМАРАЛӢ,”ҶТ”