Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода зимни нишасти матбуотӣ қайд намуд, ки соли 2018 нақшаи андозҳо ва дигар пардохтҳои ҳатмӣ, ки ҷамъоварии онҳо ба зиммаи мақомоти андоз гузошта шудааст, ба андозаи 100,6% таъмин гардида, ба буҷет 10 млрд. 523,3 млн. сомонӣ ворид карда шуд. Ин нисбат ба нишондиҳандаҳои нақшавӣ 62,6 млн. сомонӣ зиёд мебошад.

Зикр гардид, ки ҷиҳати беҳтар намудани хизматрасонӣ ба шаҳрвандон ва андозсупорандагон якчанд модулҳои нави электронии хизматрасонӣ ва маъмурикунонии андоз омода гардида, мавриди амал қарор дода шуданд.

Инчунин бо мақсади ба стандартҳои байналмилалӣ ҷавобгӯ намудани барномаҳои Системаи иттилоотии андоз ва ба роҳ мондани намудҳои нави хизматрасонӣ боз 11 модули алоҳида, аз ҷумла “Равзанаи ягона”, “Бақайдгирии шахсони ҳуқуқӣ”, “Бақайдгирии шахсони воқеӣ”, “Бақайдгирии мошинҳои назорати хазинавӣ”, “Бақайдгирии молу мулки ғайриманқул”, “Бақайдгирии воситаҳои нақлиёт” ва ғайраҳо омода карда шудаанд. Ин намуди хизматрасониҳо моҳи марти соли 2019 ба роҳ монда шуда, имконият медиҳанд, ки ташкили кор ва назорати андозҳо беҳтар карда шавад.

“Дар барномаи бақайдгирии давлатӣ — “Равзанаи ягона” аз оғози соли 2018 модули нави хизматрасонӣ мавриди амал қарор дода шуд. Барномаи мазкур имконият дод, ки муроҷиаткунандагон ариза ва ҳуҷҷатҳояшонро барои бақайдгирии давлатӣ тариқи электронӣ пешниҳод намоянд”,- иброз намуд раиси Кумитаи андоз.

Ба зикри мавсуф, дар ин давра аллакай зиёда аз 4300 нафар шаҳрвандон барои анҷом додани бақайдгирии давлатӣ тариқи электронӣ муроҷиат намуданд. Инчунин ҷиҳати васеъ намудани истифодаи ин намуди хизматрасонӣ чораҷӯӣ идома дорад.