12 июн дар қасри варзиши шаҳри Хуҷанд ярмаркаи байналмилалии савдо “Суғд-2025” баргузор гардид, ки дар он намояндагон аз шаҳри Душанбе, вилояти Хатлон, корпусҳои дипломатӣ, соҳибкорону сармоягузорон, намояндагони тиҷоратӣ аз 20 кишвари дуру наздик, ташкилотҳои молиявӣ, шарикони рушд, дар умум беш аз 500 нафар меҳмонон иштирок намуданд.

Раҷаб Аҳмадзода, раиси вилояти Суғд ҳайати меҳмононро ба Суғди бостонӣ хайрамақдам гуфта, ташкил ва дар сатҳи баланд баргузор гардидани намоишгоҳи байналмилалии “Суғд-2025”-ро татбиқи ҳадафҳои созандаи давлату Ҳукумат, амалишавии дастуру супоришҳои Пешвои миллат, Президенти мамлакат муҳтарам Эмомалӣ Раҳмон маънидод намуд.

Гуфта шуд, ки дар вилояти Суғд баргузор намудани ярмаркаю намоишгоҳҳои сатҳи баланд ба ҳукми анъана даромада, дар ин замина ҳамкориҳои тиҷоративу саноатӣ ва муносиботи дӯстонаву ҳасанаи вилояти Суғд бо кишварҳои дуру наздик боз ҳам мустаҳкам мегардад. Дар шаҳру ноҳияҳои вилоят то ҷашни 35-солагии Истиқлоли давлатӣ бунёди беш аз 700 корхонаҳои саноатӣ ба нақша гирфита шуда, ҳамасола то 140 корхонаҳои нав ба истифода дода мешавад. Бо мақсади саҳм гузоштан дар рушди соҳаи саноат дар вилоят фазои муносиби сармоягузорӣ фароҳам оварда шуда, соҳибкорони тоҷик дар ҳамкорӣ бо ҳамтоёни худ корхонаҳои муштаракро таъсис дода, истеҳсоли маҳсулоти ивазкунандаи воридот ва ба содирот нигаронидашударо ба роҳ мондаанд.

Ҳайтаи меҳмонон аз намоишгоҳи байналмилалии савдо “Суғд-2025” дидан намуда, бо имконият, зарфият ва иқтидорҳои истеҳсолии корхонаҳои саноатӣ, соҳаи кишоварзӣ, сайёҳиву ҳунармандӣ аз наздик шинос шуданд. Корхонаҳои саноатии вилояти Суғд маҳсулотро мутобиқ ба стандартҳои ҷаҳонӣ, бо басту банди замонавӣ ва қобили таваҷҷуҳ пешниҳод намуда, аз меҳмонон ба он баҳои баланд доданд.

Мавриди зикр аст, ки намоишгоҳи байналмилалии савдо “Суғд-2025” то 14-уми июн идома меёбад. Дар доираи он мулоқоти соҳибкорон, бизнес-форум ва як қатор чорабиниҳои муҳим дар назар дошта шуда, ба имзо расидани санадҳои муҳими ҳамкорӣ ба нақша гирифта шудааст.

Субҳиддин ҚОДИРОВ, “ҶТ”